Noe Lopez, adestrador do #SILVA2526, afirmou na previa do choque ante o CD Boiro que «no fútbol, a vitoria sempre axuda a crer máis no traballo semanal, e o grupo traballou con moitas gañas o plan de partido que temos para a visita ao Boiro».
Para o técnico «a confianza é clave para o rendemento do grupo, e as vitorias reforzan o ánimo. Isto acaba de comezar e temos que estar preparados para calquera situación».
Sobre o traballo semanal, incidiu en que «centrámolo nos aspectos que consideramos importantes para o partido en Boiro: de que forma atacar, onde presionar e intentar minimizar as virtudes do rival, todo isto acompañado dun bo traballo condicional».
Con respecto ao partido, o adestrador silvista indicou que «afrontámolo con moitas gañas de competir. Despois de romper a rachada negativa, temos claro que debemos seguir sumando, se é posible de tres en tres puntos, e seguir medrando tanto no xogo como nos resultados cada semana».
«É un rival que vén de gañar 0-3 como visitante, moi dinámico, con bos futbolistas e moita xuventude. Será clave saber xestionar os ritmos de xogo do partido e poder facerlles dano nos aspectos que consideramos máis vulnerables», explicou sobre o rival.
Para o técnico, «a base será non cometer os erros groseiros que tivemos nas nosas tres saídas anteriores e que condicionaron os partidos. A partir desa seguridade defensiva, queremos que o equipo siga sendo agresivo sen balón, e sabendo que temos moito marxe de mellora con balón, poder xerar situacións de gol mediante o plan de partido preparado».
Sobre o ambiente, considera que dende o principio «foi moi bo. Obviamente, coa vitoria hai máis ledicia ca en semanas anteriores, pero somos conscientes de que isto acaba de comezar e que, coa igualdade que hai, a competición aínda vai dar moitas voltas».